domingo, 3 de xuño de 2018

PREMIOS I CONCURSO FOTOGRÁFICO "PEDRO ARMESTRE" 2018

     Na XI Romaría das Letras Galegas, celebrada no IES Castro de Baronceli o pasado 21 de maio, fixemos entrega de varios dos certames e concursos celebrados ao longo do curso. Nesa data dimos a coñecer as fotos premiadas no I Concurso Fotográfico "Pedro Armestre" (concurso convocado a partir da súa visita ao noso Baronceli neste curso), que neste primeira edición tivo como temática o cambio climático, en consonancia con moitos dos proxectos socioambientais nos que Pedro traballa.


     Velaquí as autoras e fotos premiadas (de esquerda a dereita: Tatiana, Emily, Paula e Laura):


1º premio - "Camiño ao desastre" de Laura Rodríguez Estravíz:

Finalista - "As nosas raíces en perigo" de Paula Sanchoyerto Rodríguez:

Finalista - "Un río sen auga é un río sen fauna" de Paula Sanchoyerto Rodríguez:

Finalista - "Un anaco do desxeo polar" de Tatiana Barja Rivero:

Finalista - "O río Mente" de Emily Prieto Villarino:

     Neste enlace podedes acceder a todas as fotografías participantes no I Concurso Fotográfico "Pedro Armestre" (na seguinte imaxe aparecen @s autores/as de cada foto).


     Moitos parabéns ás alumnas premiadas e a tod@s @s participantes. Tentar reflectir en imaxes un problema complexo como é o do cambio climático -que nos compromete a tod@s- non é unha tarefa doada, como puidéchedes comprobar. Reflexionar sobre o tema, as súas causas e posibles solucións, e debatilo en común para comprometernos máis con él, foi o obxectivo máis importante do concurso. Grazas, Pedro Armestre, pola honra de participar tamén como xurado no concurso, e por seguir compartindo con nós os proxectos e causas nas que traballas.

domingo, 27 de maio de 2018

XI ROMARÍA DAS LETRAS GALEGAS 2018

     O luns 21 de maio celebramos no IES Castro de Baronceli a XI Romaría das Letras Galegas. Contamos neste día ca presencia da actriz, directora e profesora Mariana Fernández “Carballal”, natural de Albarellos, a quen adicamos un aula no acto inagural da Romaría.
(Diseño do cartel anunciador: Ismael Fernández e Martín Francisco, de 3º A)

     A adicación dun aula durante a Romaría das Letras ten como sentido dar protagonismo no centro a persoas vencelladas –dun ou doutro xeito– aos concellos de procedencia dos nosos alumn@s, e cuxa traxectoria profesional e persoal poida servir de inspiración para eles. A escolla de Mariana Carballal, por parte da comunidade educativa do Baronceli, débese a moitos motivos, non só pola súa importante traxectoria como actriz, directora e profesora, senón tamén pola súa implicación e compromiso persoal coa nosa cultura e con valores humanos tan importantes como a igualdade de xénero.


     A inaguración da aula co seu nome foi seguida dun encontro con toda a comunidade educativa do centro, orientado sobre todo aos nos@s alumn@s. Un tempo de comunicación e diálogo onde Mariana nos contou, con proximidade e sinceridade, as inquedanzas que a levaron a adicarse ao mundo das artes escénicas, as dificultades que atopou no seu camiño vital, a realidade –ás veces idealizada- d@s artistas que teñen que aprender continuamente a convivir cos momentos de maior “éxito” profesional (recoñecemento mediático, que non é o mesmo...) e tamén con non poucos momentos de dificultades -sen deixar de ser eles mesm@s nin nun caso nin no outro-... Apelou ás nosas alumnas: “Nós, na miña xeración, non tivemos apenas referentes en feminino do que nos gustaría chegar a ser ou facer, porque a historia e tradicións o silenciaban ou impedían. Vós tedes a sorte de poder aspirar a ser todo aquelo que queirades ser: facédeo!” Inspirou a tod@s @s nos@s rapaces: “Loitade por conseguir adicarvos a aquilo que soñades”. Impulsounos a buscar un futuro no que ser felices, e afrontar con determinación os atrancos e problemas que inevitablemente virán. Unha lección de vida coherente e co corazón aberto que @s nos@s alumn@s, confiamos, non esquecerán. Mil grazas, Mariana, polo que compartiches con nós!!


(enlace ás fotos na inaguración da aula e charla-coloquio de Mariana)

     Trala inaguración da aula e a charla-diálogo con Mariana, celebramos o festival, no que diferentes grupos de alumn@s interpretaron varias actuacións musicais que levaban tempo ensaiando para a ocasión. Queremos recoñecer aquí o labor realizado dende as clases de Música; cada actuación musical é o froito dunha planificación nada sinxela, dun traballo en equipo onde o que fai cada quen inflúe no éxito do conxunto, e de non poucas horas de ensaios con momentos altos e baixos... unha importante aprendizaxe para a vida mesma. É xusto destacar tamén o bo facer do grupo de 4º ESO na planificación e organización de boa parte dos actos da Romaría, especialmente no tocante ao festival e aos xogos populares, na realización de tan colorido fondo no escenario por parte dos alumn@s de Ed. Plástica, a presentación do festival por parte de Julie e Estrella... Parabéns polo voso traballo e o resultado acadado!!


(enlace ás fotos do festival)

     Durante o festival entregáronse, tamén, os premios de varios certames e concursos recentes: Concurso de Marcapáxinas da Biblioteca, Retos no Castelo de Monterrei para as parellas TEI, I Concurso Fotográfico Pedro Armestre sobre o cambio climático, Concurso de Carteis da XI Romaría, e mencións aos premiad@s e finalistas dos certames literarios do concello de Verín “Antonio Fernández Pérez” (relato curto) e “Xosé Carlos Caneiro” (poesía). Parabéns a tod@s @s premiados, e tamén a tod@s @s participantes, pola vosa iniciativa e creatividade!!

     Tralo festival, como é tradición na Romaría das Letras, compartimos un xantar popular na zona exterior cuberta do noso centro, onde non faltaron pratos típicos das nosas celebracións: empanada, churrasco... Unha nova ocasión para comprobar o bo facer das nosas cociñeiras Sira e Pepita, a quen dende aquí felicitamos e agradecemos a súa adicación diaria. Na sobremesa, como de costume, un experto xurado –do que Mariana tamén formou parte­– probou e concedeu os premios do Concurso de Larpeiradas Caseiras, tarefa non sinxela (pero nada amarga!) dado o número de participantes nesta ocasión.


     E para deleitar a sobremesa e os doces, varios dos membros do noso Baronceli amenizaron o momento interpretando algunhas pezas da nosa música tradicional. Ao ritmo de muiñeiras, xotas, pasodobles, rumbas... desfrutamos, aplaudimos, e @s máis osad@s bailaron máis dunha peza. Non deixemos de desfrutar xuntos das nosas tradicións, e entre elas, da nosa música!!


(enlace ás fotos do xantar e sobremesa)

     Xa como remate da Romaría, toda a comunidade educativa participamos nunha serie de xogos tradicionais, organizados por quendas, e dirixidos e explicados polos alumn@s de 4º ESO. O noso recoñecemento, novamente, aos alumn@s de 4º pola adicación na preparación e desenvolvemento deste e outros actos da Romaría, e a Irma a súa profesora de Educación Física, ca que realizaron murais explicativos e organizaron a participación nos xogos.


(enlace ás fotos dos xogos tradicionais)

     Neste último enlace podedes acceder a todas as fotos da XI Romaría das Letras Galegas (xa incluídas por apartados nos enlaces anteriores). Agradecemos, unha vez máis, a Mariana Carballal a súa participación nesta data tan sinalada no noso Baronceli, e ter compartido con nós as súas experiencias. Non queremos deixar de destacar o valor engadido que esta e outras actividades posúen, en contraposición a unha sociedade baseada no consumismo e individualismo, que pretende impoñerse nos diferentes ámbitos da vida (tamén no sociocultural e no tempo de lecer). Poñamos en valor as nosas tradicións e celebracións colectivas, que, sen necesidade de grandes aportacións económicas, contan co incalculable valor da participación de tod@s compartindo tantas cousas que nos unen... Moita vida á Romaría das Letras e moita vida ao Baronceli!!!

domingo, 22 de abril de 2018

ENTROIDO 2018

No seguinte enlace podedes acceder, na conta de Facebook do centro, a todas as fotos do Xoves de Comadres no noso Baronceli, celebrando a festa de Entroido.


Manteñamos e desfrutemos xuntos das nosas festas e tradicións!!

PREMIOS CONTRA A VIOLENCIA DE XÉNERO

Con non pouco retraso, anunciamos no noso Baronceli os carteis premiados no Concurso de "Tuits" contra a Violencia de Xénero, e entregamos os premios ás autoras dos carteis gañadores.


1º premio - Paula Sanchoyerto:

Finalista - Laura Rodríguez:

Finalista  - Sheila Prieto:

Finalista - Uxía Martínez:

Calquer data e ocasión será boa para reflexionar sobre este problema, as súas raíces, e as solucións que entre tod@s debemos aportar...

Noraboa ás gañadoras e a todos os participantes no concurso!!

luns, 12 de febreiro de 2018

I CONCURSO FOTOGRÁFICO "PEDRO ARMESTRE"

Fai un par de meses desfrutamos da inesquecible visita de Pedro Armestre ao noso Baronceli, aprazada dende maio do anterior 2017 cando inaguramos unha aula co seu nome no noso centro.

Neste mes de febreiro convocamos o I Concurso Fotográfico "Pedro Armestre", arredor do tema do cambio climático. Queremos que sexa unha homenaxe a Pedro, que xa é parte do noso Baronceli. Queremos tamén que sexa unha boa ocasión para reflexionar sobre un tema que nos implica a todos, individual e colectivamente, e para exercitar a creatividade e a imaxinación. Pensade un bo título que relacione as vosas fotografías cas causas ou consecuencias do cambio climático...


Paralelamente ao concurso fotográfico no centro (con exposición e premios propios), podedes enviar as vosas fotografías ao concurso fotográfico do Galiciencia 2018 (premede neste enlace), que fixemos coincidir co noso concurso do centro nas súas bases e datas.

Tedes ata o 28 de febreiro, anmádevos a participar!!!


FOTONTROIDO 2018

Un ano máis convocouse o concurso fotográfico do Entroido "Fotontroido 2018", no que participamos os tres institutos de Verín (IES Xesús Taboada Chivite, IES García Barbón, IES Castro de Baronceli). Tedes ata o 19 de febreiro para enviar as vosas fotografías entroideiras...

Desfrutade do Entroido e animádevos a participar!!!


DÍA DA PAZ NO BARONCELI: A ÁRBORE DOS DESEXOS


O día 30 de xaneiro conmemoramos o Día Mundial da Paz cunha fermosa actividade no noso Baronceli, iniciativa de Marta a nosa profe de Educación Plástica.

Parabéns a tod@s por aportar os vosos desexos individuais e colectivos de paz nesa simbólica e bela árbore.

Mirade o enlace completo na conta de Facebook do noso instituto (premer na foto):